FeFo stivra mearridii čoahkkimis skábmamánu 27. b. ahte mátkeealáhusfitnodagaid vuoruhuvvon bivdukoarttaid ortnet bissehuvvo dassážiigo lea gávdnon dohkálaš molssaeaktu. Plána mielde galgá ođđa ortnet leat sajis ovdal bivdoáigodaga 2026/27.

- Mii galgat leat einnostahtti ja profeššunealla eanaeaiggádat geat hálddašit eatnamiid buorrin sidjiide geat ásset Finnmárkkus. Nu go ortnet lea doaibman dássážii, de lea dat leamaš unnán einnostahtti mátkeealáhusfitnodagaide ja mátkkošteaddji bivdiide, seammás go dat lea addán ollu lassibarggu hálddahussii. Danne mii oaidnit dárbbu bissehit ortnega dassážii go mii ovttasráđiid aktevrraiguin leat gávdnan dakkár čovdosa mii addá ealáhuseallimii ja bivdiide einnostahttivuođa, ja seammás lea ulbmillaš FeFoi, dadjá FeFo stivrajođiheaddji, Geir Thrane kommentáras.

FeFo vuovdá ráddjejuvvon beaivekoarttaid mátkkošteaddji bivdiide ja 2011 rájes lea leamaš dakkár ortnet gos báikkálaš mátkeealáhusfitnodagain lea leamaš vejolašvuohta ohcat bivdukoarta iežaset kundariidda. Gitta bealli beaivekorttain bivdoguovllus lea fállojuvvon mátkeealáhusfitnodagaide.
Ortnet lea dađistaga eanet ja eanet geavahuvvon, ja 2024:s lea mátkeealáhusfitnodagain leamaš eambbo jearru bivdukoarttaide go fálaldat. Dát lea dagahan dan ahte ollu fitnodagat eai leat ožžon daid koarttaid maid leat ohcan, ja ortnet ii leat addán dan einnostahttivuođa bivdiide ja ealáhusaide mii lei ulbmilin. Ortnet lea maid addán mearkkašahtti lassibarggu FeFoi.

-Seammás go mii bissehat mátkeealáhusortnega, de mii álgit bivdukoartavuovdima árat i nu ahte bivdit geat háliidit oastit bivdukoarta árrat, ožžot vejolašvuođa dasa, joatká Thrane.
Ovddasguvlui áigu FeFo árvvoštallat čovdosiid ja muddet bivdukoarttaortnega smávvafuođđobivdui nu ahte lea einnostahtti bivdiide ja ealáhusaide. Boahtte bivdoáigodagas lea ráddjejuvvon bivdukoarttat olámuttos mátkkošteaddji bivdiide cuoŋománus gitta miessemánnui. Maŋŋá nállelogu kártema borgemánus ja dan bohtosa vuođul árvvoštallojuvvo vuovdit eambbo beaivekoarttaid.

Stivra mearridii maiddái ahte mátkkošteaddji bivdiide ii fállojuvvo áigodatkoarta mii lea gustojeaddji čakčamánu 25. beaivvi rájes 2025/2026 bivdoáigodaga rájes. Stuora beroštumi geažil de ii dat atte šat doarvái einnostahttivuođa ja ovdamuniid mátkkošteaddji bivdái, daningo ollu bivdoguovllut devdojuvvojit árrat beaivekoarttaiguin.

-Mii árvvoštallat danin ahte bivdukoartavuovdima rievdadeapmi, nu ahte mátkkošteaddji bivdiide fállojuvvo dušše beaivekorta, addá eanet einnostahttivuođa ja čielggasmahttá mátkkošteddjiide sin vejolašvuođa bivdit Finnmárkkuopmodagas, loahpaha Thrane.

 Loga stivraášši fefo.no: FeFo-stivra 27.11.2024: FeFo-styret 27.11.2024 - Finnmarkseiendommen